Preziadas parochianas, preziai parochians

Schegie che mo 11 onns ein vargai dapi la davosa revisiun dalla constituziun dalla Pleiv s. Gions ei la suprastonza sedecidida per ina revisiun totala. Leutier dat ei plirs motivs. La cumposiziun dalla suprastonza corrispunda buca pli allas pretensiuns dalla constituziun ed igl ei necessari da simplificar l’organisaziun dalla pleiv. Plinavon presenta il Corpus catolicum ina revisiun totala dalla constituziun per la Baselgia cantunala dil Grischun. Quella vegn tractada quest atun el parlament e vegn en votaziun el decuors digl onn proxim. Oravontut less la suprastonza adattar la constituziun allas pretensiuns dad oz ed el medem mument era risguardar la nova constituziun dalla Baselgia cantunala. La constituziun presentada lubescha alla suprastonza d’agir pli flexiblamein e da s’adattar dafertontier allas midadas dil temps actual. Da constatar ei era che las cumpetenzas ed ils dretgs da parochianas e parochians vegnan buca reduci ella nova constituziun.

Las midadas essenzialas ein:

Art. 2 Intent

En art. 2 vegn niev menziunau l’instrucziun religiusa dils affons da nossa pleiv e la promtadad per ina collaboraziun surregiunala. Gest quella collaboraziun surregiunala ei actualmein en discussiun. Ina gruppa da lavur dallas treis pleivs Mustér, Medel e Tujetsch discussiunescha las premissas per ina tala collaboraziun. En vesta dalla munconza da plevons – oravontut plevons indigens e romontschs – ei la collaboraziun cun autras pleivs indispensabla. Nus stuein ir da quei anora, ch’ei dat el futur mo pli in plevon en Sursassiala. Quei pretenda ina adattaziun dallas structuras ed in engaschament d’in assistenza pastorala per sustener l’incarica dil plevon.

Art. 9 Organs

Il cussegl dalla pleiv era in organ dalla pleiv che ha piars sia funcziun. Ina gada ad onn, mintgamai in’ura avon la radunonza generala, s’entupavan ils ugaus-caplutta en ina cuorta seduta. Leu informava mintga ugau-caplutta davart il stan dil fondo dalla caplutta. Ina funcziun da cussegl per la suprastonza ei buca pli dada. Ord quei motiv vegn quei organ dalla pleiv sligiaus. 

Art. 12 Cumpetenzas dalla radunonza generala

Quei artechel cuntegn in niev passus pertuccont l’elecziun resp. la nunreelecziun dil plevon ni dalla menadra/dil menader dalla pleiv. Egl avegnir vegn igl uestgiu a conceder la missio per regla per in temps d’uffeci da sis onns. Niev sto la constituziun cuntener la pusseivladad da reeleger, denton era da buca reeleger il plevon en ina pleiv. 

Egl avegnir eis ei oravontut da risguardar che buca pli mo plevons ein responsabels per ed en ina pleiv, mobein pli e pli era collaboraturas/collaboraturs pastorals scolai senza ordinaziun che san gest tenor situaziun surprender la funcziun da menadra/menader d’ina pleiv. Perquei vegn era reglau niev  l’elecziun resp. la nunreelecziun d’ina menadra/in menader dalla pleiv en cass da vacanza da plevon. Aschinavon ch’ei dess ina vacanza sur pli liung temps, ei previu l’elecziun d’ina menadra/d’in menader entras la radunonza generala. Quella persuna vegness lu era commembra/commember dalla suprastonza.

Pigl auter restan las cumpetenzas dalla radunonza generala las medemas sco tochen dacheu.

Art. 17 Cumposiziun dalla suprastonza

La nova constituziun preveda in diember minimal da quater commembers en suprastonza. Ella  seconstituescha sesezza. Eligi vegnan commembers en suprastonza, la repartiziun dils singuls ressorts ni incaricas fa la suprastonza sezza. Quei lubescha in agir pli flexibel ed oravontut ina repartiziun dallas lavurs tenor las habilitads e cumpetenzas dils commembers da suprastonza. 

Art. 21 Revisorat

La cumissiun da gestiun vegn remplazzada entras in revisorat. Quei revisorat secumpona da dus  commembers che disponan sur dallas qualificaziuns necessarias ni da dus commembers senza enconuschientschas specialas en contabilitad che vegnan lu susteni d’in biro fiduziari extern. Cun quellas duas pusseivladads sa la qualitad dalla revisiun vegnir garantida. 

Per ulteriuras damondas ed informaziuns supplementaras stein nus secapescha bugen a disposizun. Eventualas damondas ein d’inoltrar al secretariat dalla pleiv.

Mustér, entschatta mars 2023                          Suprastonza dalla pleiv s. Gions Mustér