En cass da mortori ei da far il suandont:

Dar part agl uffeci parochial, secretaria Jris Lombris (076 536 04 03). Ella coordinescha sin giavisch ina viseta digl augsegner ed orientescha ils calusters. Ei vegn tuccau da miert ella baselgia parochiala, tier in vischin/ina vischina d’in uclaun era ella baselgia ni caplutta da quel. Il tuccar da miert succeda suenter ver informau ils parents e cu il di da sepultura ei fixaus. Ensemen cul tuccar vegn publicau il mortori sin tabla nera da vischnaunca, ellas scaffettas d’informaziun a S. Gions, Cavardiras e Segnas. Plinavon era sin questa pagina d’internet.

Ils parents dattan part al miedi che ha da constatar la mort ed informeschan l’administraziun communala. Medemamein informeschan els igl institut da sepultura che procura per il vischi, la crusch ed il vestgir il defunct. La vischnaunca organisescha il cavar fossa ed il satrar.

Las annunzias ellas gasettas ein caussa dalla famiglia. Plinavon eis ei d’engrau da preparar entgins cavazzins per ils discuors cul plevon, per che quel sappi preparar il survetsch divin. Igl organist vegn organisaus dalla pleiv.

Per in defunct vegn recitau duas gadas il s. Rusari, per defuncts da Segnas ina gada a Segnas ed ina gada a Vitg. La messa dil tierz succeda per ordinari la fin dalla jamna suandonta. Mintgamai ina gada el meins november vegn recitau il Salit a Nossadunna en baselgia parochiala a S. Gions per tut ils defuncts, en special per quels morts duront igl onn actual e dapi la davosa devoziun.