«Sut tia protecziun encurrin nus refugi, sontga Mumma da Diu»

Oraziun da papa Francestg I pil meins da matg

En quella situaziun dramatica spir pitir e temas che peisa sigl entir mund, sevulvin nus tier tei, Mumma da Diu e nossa mumma ed encurrin refugi sut tia protecziun.

O purschala Maria, volva tes egl misericordeivels en questa pandemia da coronavirus sin nus e consolescha tut quels che pliran e bragian per lur parents sparti, ils quals ein vegni satrai en ina fuorma che fa mal all’olma. Sustegn tuts che teman per ils malsauns als quals els astgan buca s‘avischinar muort prighel dad infecziun. Regala fidonza als tals che fan quitaus pil futur incert e las consequenzas sin economia e lavur.

Mumma da Diu e nossa mumma, implora per nus tier Diu, il bab dalla misericordia, che questa dira emprova fineschi e che speronza e pasch semuossi puspei al horizont. Interceda per nus sco a Cana tier tiu divin Fegl che las famiglias dils malsauns e sparti vegnien consoladas e ch’ellas possien arver lur cors danovamein alla fidonza.

Protegia ils miedis, las tgirunzas ed ils tgirunzs, il persunal da sanadad ed ils voluntaris che rescan en emprema lingia lur veta per salvar quella dils auters. Accumpogna lur stentas heroicas e dai ad els forza, buontad e salit.

Accumpogna quellas e quels che tgiran di e notg malsauns e gida ils sacerdots ch’emprovan cun engaschi pastoral ed ardiment evangelical da gidar e sustener tuts.

Sontga Purschala, sclarescha igl intelletg dallas perscrutadadras e dils perscrutaders ch‘els anflien sligiaziuns adequatas per cumbatter il virus.

Assista ils responsabels dallas naziuns ch’els opereschien cun sabientscha, provediment e generusadad, sustenend quels che han buc il necessari da viver, prevesend a liunga vesta sligiaziuns socialas ed economicas el spért dalla solidaritad.

Sontga Maria, tucca la cunscienzia per che las summas enormas impundidas per augmentar sistems dad armas adina pli rufinai vegnien destinadas per studis adequats da prevegnir a futuras catastrofas semegliontas.

O Mumma amada, fai crescher el mund il senn d’appartenenza ad ina unica gronda famiglia per che nus vegnien en agid cun spért fratern e solidaric alla schi gronda paupradad e situaziun da miseria. Encuraschescha la fermezia en la cardientscha per che nus hagien perseveronza da survir e constanza dad urar.

O Maria, consoladra dils contristai, pren tes fegls tribulai en tes mauns ed urbescha che Diu intervegn cun siu maun tutpussent per liberar nus da questa epidemia terribla, per che veta sappi reprender siu cuors normal senza quitaus.

A ti fidein nus, ti che resplendas sin nies viadi sco segn da salit e speronza, o buntadeivla, pia, dultscha purschala Maria. Amen.

translaziun: G. Tenner

Suandei nus per plascher sin: