Priedi devoziun da matg 2018 en Claustra a Mustér

MARIA FA LA VEGLIA DA DIU

Ev. Mt. 12. 46-50

Nus venerein Maria sco Mumma da Diu e Mumma dalla Baselgia. La Baselgia catolica festivescha Maria sco «Mumma dalla Baselgia»; e quella fiasta vegn uss commemorada ell’entira Baselgia. Papa Francestg ha decidiu che quella fiasta vegni pridasi el calender roman pe glendisdis Tschuncheismas, e ch’ins festiveschi ella naven dad uss mintg’onn. - Nus lein oz mirar sin la veta da Maria, e sin la muntada che siu exempel ha per nus e per la Baselgia. La veta da Maria ei seformada grondamein entras experientschas legreivlas ed experientschas da dolur. Co ei quei svilup staus tier Maria e tgei savein nus emprender ordlunder ?

Maria ei mai stad’ éri pervia da trumpadas ni schliatas experientschas, mobein ei ida vinavon, pass per pass, ensemen cun siu Fegl.

Gia suenter l’Annunziaziun ha ella fatg in’experientscha fetg dolorusa. Ella ha sentiu e supportau ils dubis e la nuncapientscha specialmein da Giusep, siu spus; mo da l’autra vart spitgava ella plein speronza sin quei affon empermess e selegrava sin la naschientscha da Jesus. – La proxima dolorusa experientscha ha ella fatg, cu ella veva piars gl’affon da dudisch onns duront il pelegrinadi a Jerusalem. Ses geniturs fuvan dil meini ch’el sesanfli denter ses parents ed han lu encuretg el treis dis plein dolur. E lu han Maria e Giusep buca saviu capir il plaid da Jesus, cu el ha declarau: «Veis vus buca saviu, che jeu hai stuiu esser en queich’ei da miu Bab?»  

Nus sez mein savens nossa via dalla veta tenor gl’agen gust e sesentin en uorden. E nus emblidein da far stem, schebein Jesus ei cun nus sin via. Sedumandein nus, tgei plan El ha per nus? Encurin nus siu cussegl, cu ei setracta da decisiuns per la veta? Sche nus vein piars la relaziun cun El, lu eis ei necessari dad encurir da rudien e da tedlar sin la vusch da nies cor, per anflar danovamein il contact cun Jesus.

Nus vein udiu oz in plaid enconuschent dalla Bibla; per biars eis el denton nuncapeivels. Ha Jesus buca giu interess da sia mumma e da ses parents? Fuvan els ad el tuttina, cu els spitgavan avon ésch?

Per franc buc! Mo Jesus ha declarau clar e bein: «Tgi che fa la voluntad da miu Bab en tschiel, quel ei per mei frar e sora e mumma». Nus vesein cheu eclatantamein, che Maria ha adina encuretg la voluntad da Diu ed ha stuiu sesuttametter. Nus vesein, che Maria ha adina mess la voluntad da Diu sigl emprem plaz. Perquei ha Dieus era confirmau ella sco mumma da siu Fegl.

In’autra episoda ella veta da Maria ein las nozzas a Cana. Leu ha ella detg als survients: «Fagei quei ch’EL di».

Maria ha viu la situaziun penibla dils nozzadurs e ha vuliu gidar. Ella sefida digl agid da siu Fegl. Cheu vesein nus, co Maria ei ina dunna che vul segidar, e che ha in cor aviert per ils auters. Aschia ha ella reagau, perquei ch’ella fuva en relaziun cun Diu. –

Ozildi dat ei bia carstgauns che fan lavur sociala, mo senza relaziun cun Diu. – Maria muossa a nus, co era nus savein gidar ils auters, ed el medem temps sefidar da Diu.

Sia fidonza ei vegnida remunerada rehamein. L’aua che veva negin gust, ei daventada in vin delicius, Jesus ha fatg cheu sia emprema enzenna. Sche nus essan unien nies defar, seigi cun caussas ni cun carstgauns, lu ei tut benediu. Bia da quei che ha negin gust en nies mintgadi, sa semidar e purtar a nus bia plascher.

Ils hosps da nozzas ein sesmarvegliai che quei bien vin ei vegnius survius pér alla fin dalla fiasta. Entras nies contact cun Diu, san era nossas grevas situaziuns ella veta semidar.

Maria ha adina puspei fatg novs pass enviers Diu, enviers ina veta cumpleina. A Cana ha Jesus numnau ella «dunna». Pli tard, sut la crusch, ha el dau ella a nus sco «mumma». Quei ei in grond pass enviers la plenezia dalla veta, enviers la resurrecziun suenter tut pitir.

«Tut quei ch’el di a vus, fagei»– quei di Maria era a nus. Lu essan nus quei che Jesus ha detg: ses frars e sias soras. Quei ei la via dalla conversiun en nossa veta spirituala. Sche nus suondein Jesus, lu ei quei in process continuau che cuoza l’entira veta. Nus savein comparegliar quei cun ina excursiun sin in cuolm. Gl’emprem enquer’jeu ò la via, lu ha ei num: ir pass per pass tochen sin la tschema.

Per nus munta quei: Nus essan sedecidiper Cristus, e nus seunincun el, e mein lu, ensemen cun el e sia mumma. Ell’amicezia cun EL savein nus crescher e semadirar ed aschia arrivar pli e pli alla plenezia da nossa veta.

Nus mirein uss aunc sil pli impurtont punct ella veta da Maria: quel sil Calvari, cu Jesus ei morts vid la crusch. Cheu ha ella teniu ò cun siu Fegl ed ei buca sedesparada. Mo quei pitir ei buca staus la staziun finala per Jesus, per sia mumma e per ses giuvnals. Tut ei semidau ella levada, en legria ed en veta perpetna. Da Tschuncheismas han Maria ed ils apostels sentiu la ferma preschientscha da Diu. Igl entusiassem per Jesus e siu reginavel ei sefatgs valer, aschia ch’els ha saviu dar perdetga e purtar la buna nova vinavon egl entir mund.

Maria ei per nus exempel ella cardientscha; ella ei la Mumma dalla Baselgia.  Jeu less uss concluder cun in text dil teolog Paul Zulehner che ha scret la brev suondonta a Maria:

Zun venerada Regina dil tschiel, Mumma da Diu, Mumma dalla Baselgia, cara Mumma Maria,

Gest oz less jeu scriver a ti ina brev. Nus essan el meins da matg ch’ei dedicaus specialmein a ti; e nies Papa Francestg ha avon in per jamnas declarau igl gliendisdis Tschuncheismas sco fiasta commemorativa da Maria, Mumma dalla Baselgia. Il Papa ha detg: La Baselgia ei feminina, perquei che la Baselgia ei spusa: Ella ei feminina! Ella ei mumma; ella regala la veta. Spusa e Mumma. En quei senn, che derriva da Maria, savein nus capir la dimensiun feminina dalla Baselgia. Ina dimensiun che la Baselgia piarda leu sia vera identitad, leu, nua che quella dimensiun vsereducescha ad ina uniun. Lu eis ella mo pli ina societad, ni enzatgei semegliont, mo buca pli la Baselgia. Ad ella maunca lu la fatscha materna. Gie, ti eis veramein la Mumma dalla Baselgia, e quei ei bien aschia. E cheu vein nus in punct impurtont: Ins sa buca ver Diu sco Bab, sch’ins ha buca tei sco Mumma. Tras tei arrivein nus tier tiu Fegl Jesus Cristus.

Tei astgein nus mai piarder ord vesta: En tei ei il Vierv daventaus carn: Fegl da Diu e Fegl dil carstagun…

Cara Mumma, jeu panzel nundetg per nossa Baselgia, e perquei sevolvel jeu tier tei gest uss, perquei che ti eis la Mumma da quella Baselgia. Cun tgei panzieri miras ti bein giu da tschiel sin nus? Nus vivin en grevs temps. La cardientscha svanescha pli e pli. La beinstonza ha tschaffau ils carstgauns da tala moda, ch’els piardan las veras relaziuns da lur veta: Famiglia, patria e baselgia existan mo pli agl ur. Gie, biars vegnan senza patria e senza orientaziun. Cara Mumma, gest uss vein nus basegns da tia preschientscha, da tia carezia materna, che dat a nus in da casa en tuts embrugls e tuttas confusiuns da nies temps. Cara mumma, tonscha a nus tiu maun, e meina nus in di ella patria celestiala. Quei ei miu grond desideri e mia supplica en quell’ura dalla Baselgia….    aschilunsch ord quella brev.

En quei intent lein era nus rugar tier Maria, ch’ei la mumma da nus tuts. Nus rughein en nos basegns persunals, mo nus rughein Maria era per sia benedicziun e protecziun per nossa Baselgia. Amen.