Fiasta da Pastgas 2018

Cars frars e caras soras en Cristus

Cristus ei levaus da mort en veta -- quella buna nova vegn annunziada oz sigl entir mund. Tuts carstgauns duein udir ella e selegrar. 

Pastgas ei ina fiasta che sesaulza ord la notg. Ils giuvnals da Jesus intervegnan: Il pli segir ch’ei dat en nossa veta, la mort, ei buca pli ina grondezia absoluta. La victoria sur dalla mort e sur dil puccau ei veramein dada a nus tras Jesus Cristus ch’ei levaus da mort en veta.

In film american raquenta dad in archeolog che ha fatg excavaziuns a Jerusalem. Ellas gasettas ha el schau saver ch’el hagi anflau la fossa da Jesus, mo ella fuvi buca vita. El hagi anflau leu in skelett. El ha lu declarau alla glieud: « Crucifigaus, morts e satraus seigi Jesus; levaus da mort en veta, NA, -- quei seigi el buc! Beinspert ei quella sensaziun vegnida derasada sco in cametg. La cardientscha dils cristifideivels seigi ina sgarscheivla trumpada. Silsuenter vegn mussau el film, co il mund va en decadènza en ina immensa stgiradetgna. Ils sacerdots siaran las baselgias, stezzan las candeilas. Ils paders bandunan lur claustras.

Tuts segns religius svaneschan. Ei resta in mund en stgiradetgna e tristezia. – La finala ha igl archeolog declarau: «Jeuhai trumpau il mund; jeumez hai preparau in skelett e mess quel ella fossa vita. La fossa fuva veramein vita».

Gia il patratg, ch’ei dessi negina levada dils morts, fa a nus sgarschur. Senza la levada da Cristus fuss era nossa veta senza finamira, senza senn e senza sustegn.

Lein mirar sin Maria Madleina: Ella ei ina dallas pli fideivlas giuvnalas da Jesus. Ella ei ferma sut la crusch, ed ei sco emprema alla fossa. Aschia eis ella l’emprema che dat perdetga dalla resurrecziun. Entras sia veta spinusa e sia gronda carezia per Jesus, semadirescha ella ed arriva a quella fideivladad absoluta.

Ella ei l’emprema che va da Pastags endamaun alla fossa e vesa ch’il crap sidavon ei stuschaus dad ina vart. La fossa ei vita. En sia gronda tristezia, vesa ella ina persuna sper la fossa, enconuscha denton buca quella. Per cu ina vusch plein carezia cloma siu num : « MARIA ! » sa ella, tgich’igl ei e cloma:  «RABBUNI – miu Mussader ! » Ina risposta plein ventira e carezia. Siu cor ei plein legria, ventira e beadadad. En siu cor vegn tut mo glisch. La stgiradetgna e la peina da mort semidan entras la sentupada cun Jesus en legria pascala.

A Maria Madleina ed als giuvnals dad Emmaus sesarvan ils egls; quei ein ils egls pascals dil cor. Per tras lur cardientscha ein els habels da veser Jesus; ed EL ei sedat d’enconuscher en lur pli profund. Els tuts van dalla stgiradetgna ella glisch. -- Inaga ha uestg Hämmerle formulau quei aschia:  «Jeu giavischel a nus egls da Pastgas, che vesan ella mort tochen alla glisch. Jeu giavischel a nus egls da Pastgas che vesan Diu el carstgaun ed il carstgaun en Diu. Jeu giavischel a nus egls da Pastgas che vesan da mei tochen tier tei. E cheutier giavischel jeu a vus tuts bia forza pascala».

Avon sia mort han ils apostels ed ils giuvnals viu Jesus e siu operar mo sin moda superficiala. Inaga han els schizun dumandau el, tgi dad els che survegni il meglier plaz en siu reginavel. Jesus ha censurau els e detg : « Miu reginavel ei buca da quest mund ». Duront sia passiun e mort fuvan els aschi disturbai, ch’els ein fugi plein sgarschur; per els era tut alla fin. Els ein turnai anavos tier lur clamada da bli baul ed han entschiet a pigliar pèschs. Il Cristus vivent denton ha clamau anavos els, per ch’els vivien ensemen cun EL. EL ha aviert ad els ils egls per ch’els vesien pli profund e possien capir. Lur egls pascals fuvan denton aunc buca madirs diltut, per ch’els mondien ò egl entir mund ed annunzien ch’il Cristus seigi levaus da mort en veta. Per quella missiun ha ei aunc duvrau la vegnida dil Sogn Spert da Tschuncheismas. Suenter han els lu dau perdetga cun curascha sigl entir mund.

La fossa cun sia stgiraglia senza Jesus ch’ei vivents, ha negina valeta pli. Igl ei ina trumpada. Il Cristus, levaus da mort en veta, viva; e nossa cardientscha enten EL ei negina trumpada.

Aschia eis ei era en nossa veta d’ozildi. Tgi che sa buca crer ella levada da Cristus, vesa ella mort mo las restonzas terrestras dil miert che nus purtein alla fossa. Ils egls pascals dalla cardientscha vesan dapli. Il cartent sa ch‘il defunct ei ius a casa tier Diu. Tras la carezia e la cardientscha resta l’uniun denter vivs e morts. Igl evangeli plaida era dalla missiun: Va tier tes frars e tias soras ed annunzia ad els che Cristus viva. 

 Jesus regali a nus en nossa veta egls pascals aviarts --- e la forza pascala da dar perdetga e la pasch pascala el cor. Amen.