Oz less jeu dar a vus enzacons impurtonts patratgs sin via. Fai stem con spert che nus essan el stan da far scalgias! Buca mo scalgias da glasa ni porcellan, mobein oravontut scalgias denter carstgauns. Nus vivin en in temps prigulus, en in temps nua che carstgauns sin gl‘entir mund han tonta tema. Ils terrorists mazzan semplamein carstgauns, emporta buca nua e co.
Quei deriva d’ina fallida interpretaziun dalla cardientscha d’ina autra religiun. Oz essan nus sco cristians fetg engra-zieivels che nus havein in Diu bunta-deivel e misericordeivel. Diu ei la carezia e vul era che nus carezeien in l’auter e buca mazzeien auters.
Cars geniturs giuvens ed affons: Nus havein ton motiv d’esser engrazieivels a Diu per nossa cardientscha. Tuttina untgeschan biars il contact cun auters, cun la pleiv e cun la cuminonza religiusa. Biars argumenteschan che la Baselgia, igl uestg, il cardinal seigien la cuolpa da quei. Ei quei per Vus
LA BASELGIA e VOSSA CARDIENTSCHA?
Cara cuminonza da pleiv: Nus essan Baselgia e mintgin ei persunalmein du-mandaus e mintgin duess viver sia car-dientscha cun perschuasiun. La fin da nossa veta damonda inaga Dieus buca nus, tgei che quel e quel hagi fatg, mobein: Tgei has Ti fatg per mei e co has Ti carezau mei, Ti che has retschiert ton da mei. Carezia e cardientscha san ins buca semplamein viver persuls ni mo en l’atgna famiglia, mobein ellas duessen esser integradas ella cuminonza da car-dientscha. Lu savein nus sustener in l’auter, dar forza in a l’auter e perschua-der. Ti eis impurtonta/impurtonts cheu en nossa cuminonza da cardientscha da Mustér. Jesus ei naschius, per ch’el seigi glisch pil mund. EL sclarescha il mund entir, mo ils carstgauns vulan ir lur atgnas vias. Els duein vegnir tier la glisch.
Envida ina candeila e daventa quiets! La candeila simbolisescha mia veta. Mo la glisch dalla candeila ei limitada, ella vegn a sestizzar. Mintgin da vus ha giu oz en baselgia ina candeila ardenta enta maun. Cu tuttas candeilas ardevan, havein nus giu clar ed illuminau bia. Quei ei nossa fermezia.
E tut quella glisch dein nus a Jesus, che nescha a Bethlehem. Ensemen cun EL savein nus sclarir quei grev e stgir temps. Cardientscha e carezia fan buca empaglia la veta, mobein ellas sclareschan ed ellas spetgan inaga era nus, cu nus havein da passer tras la porta dalla mort.
CARDIENTSCHA ei GLISCH. Lein pia sclarir e sesarver viers ils fugitivs che arrivan tier nus. Biars dad els han giu ina greva sort. Lein mussar ad els, che nus cristians havein plascher da nossa car-dientscha. Lein star ensemen e sclarir.
Jeu envidel vus era cordialmein alla devoziun da penetienzia sonda sera. Cheu savein nus medemamein udir e veser co nus savein esser glisch en nies mintgadi. Era eis ei bi sche vus fusses presents tier il survetsch divin la quarta dumengia d’Advent. Leu savein nus udir da sentupadas, vegnin era visai vi co nus savein viver sinceramein e cordialmein in cun l‘auter.
Plinavon envidel jeu vus a tuts survetschs divins da Nadal. Purtei la glisch a casa e sclari vossa veta en famiglia.
Da cor: Vies plevon sur Georg
