Dumengia, ils 22 da november 2015

Fiasta da Cristus Retg

Cara cuminonza, caras soras e cars frars en Cristus – sia excellenza, monsignur uestg Joshua Mar Ignathios – mes cars sur decan Alfred – msgr. avat Vigeli – confrars el survetsch sacerdotal – commembers dalla suprastonza da pleiv e cussegl pastoral dil survetsch liturgic – preziai commembers dil chor baselgia cun siu dirigent ed organist.

A vus tuts engraziel jeu cordialmein che vus essas presents e che nus savein festivar da cuminonza. Per mei ei quei oz in di special; perquei che jeu vegnel tschentaus en oz ufficialmein sco vies plevon.

L‘entschatta avrel 2013 hai jeu celebrau cheu sco administratur dalla Pleiv mi’emprema sontga messa. Gliez di hai jeu giavischau, che vus prendies si mei en vies miez ed en vossas famiglias sco frar, sco fegl e sco sacerdot. Jeu less viver cun vus e per vus. Jeu less buc esser mo in luvrer pastoral, mobein esser da casa cheu tier vus.

Quei hai jeu astgau sentir en quels onns. A biars hai jeu astgau dar ils sogns sacraments, biars han confidau a mi lur quitaus e lur legrias; da cuminonza vein nus astgau festivar eucaristia e bia bialas fiastas.

Jeu less uss raquintar dad ina experientscha persunala: L’jamna vargada fuv’ jeu inaga sin via da stgir, ed jeu hai viu enzatgei interessant. In tren cursava en direcziun Cuera. Endadens er’el illuminaus, ed ei fuva bi da mirar sin quella glisch. Jeu sun denton staus surstaus che quei tren era vits. E tonaton fuv’el punctualmein sin via, per transportar ils carstgauns el liug destinau.

Quei maletg ei semeglionts a mia veta da spiritual; e selai cumparegliar cun in viadi tras la veta.

Jeu sun naschius e carschius si ell’India, el stadi da Kerala. Suenter miu studi da teologia sun jeu vegnius ordinaus sacerdot igl onn 2000 ed hai lu gl’emprem luvrau sco spiritual e missiunari en ina pleiv cun autra cultura ed auter lungatg. Igl onn 2007 ha miu uestg tarmess mei per in studi a Ruma. Leu hai jeu fatg il doctorat en teologia da morala; duront mias vacanzas hai jeu mitgamai gidau o en differentas pleivs, era a Mustér. Las sentupadas ed il contact cun carstgauns da differents lungatgs e dad autras culturas ein adina stai in grond schenghetg per mei. Jeu sun engrazieivels per quei scazi precius en mia veta; jeu hai adina sentiu ch’ils carstgauns survegnan bia grazia da Diu. Perquei eis ei per nus era impurtont, de saver regalar vinavon quella carezia da Diu a nos concarstgauns. Jeu mez hai astgau retscheiver bia da Diu; perquei less jeu regalar vinavon bia carezia e buontad.

E cun tut quels schenghetgs ella valischa sun jeu arrivaus a Mustér ils 4 d’avrel 2013. Sche jeu drovel aunc inaga il maletg dil tren, lu less jeu dir, ch’jeu sun uss el tren cun vus ensemen, sin viadi egl avegnir. Nus tuts vein la medema finamira; nus essan sin viadi enviers il reginavel da Diu. Ei fuss buca bien, sch’jeu fuss tut persuls en quei tren. Per in augsegner eis ei immens impurtont, che biars, gie sche pusseivel tuts, seigien ensemen sin viadi. – Per mei ei la Baselgia, cun sias bunas e schliattas qualitads, era aschia in tren: Pertgei la Baselgia retscheiva sia glisch da Cristus, ed EL sclarescha quei ch’ei stgir els carstgauns. Nossa forza e nossa cardientscha per mintga di retschevein nus da Cristus el sogn sacrament digl altar.

Igl ei da grond‘ impurtonza per nossa veta, che nus restien ferms en nossa cardientscha cristiana, pia che nus restien el tren. Ed el medem temps lein nus tener en egl la bellezia dalla creaziun, la diversitad dils carstgauns dad autras culturas e dad autras religiuns ed idiologias. Per mei ei quei fetg impurtont en mia veta. 

Meinsvart eis ei impurtont e d‘avantatg da far in paus ellas staziuns dalla veta – nua ch’ei dat buns e menders temps – e tancar novas forzas spirtalas. Nus astgein buc emblidar ch’il viadi enviers nossa finamira ei liungs. Nus lein segidar e dar forza in a l’auter. Nus lein esser aviarts per tut il bi che semuossa sin via. E nus savein che Dieus ei cun nus el tren, El diregia il tren e meina nus segir a nossa finamira.

 

Jeu mez sun mo in instrument, in che fa punt, in che prepara la via per la nuviala e la grazia da Diu. Il Bien Pastur ei Jesus Cristus sez. Per Diu stun jeu a disposiziun, ed jeu sun aviarts per tuttas sentupadas. Igl essenzial fa Diu; Dieus seigi cun nus entras sia carezia, entras siu Sogn Spert. Dieus seigi cun nus; ed jeu supplicheschel vus era vinavon per vies sustegn e per vossa oraziun.

Jeu engraziel a tuts che han cumpignau mei sin mia via. Ed era jeu less esser per vus in cumpogn e gidonter sin vossa via. A vus tuts ch’essas vegni per festivar cun mei  e par far oraziun per mei ditgel jeu in resentiu „Dieus paghi.“                                Vies plevon: sur Georg