1.    INGRESS

Il celebrant entra culs ministrants en baselgia. L’orgla suna (excepiu advent e cureisma). Duront igl ingress conta il pievel ina canzun. Tuts stattan sin peis.

2.    SALID ED INTRODUCZIUN

C Enten num dil Bab + e dil Fegl + e dil Spért sogn.

T Amen.

C Il Segner seigi cun vus. (ni in auter text)

T E cun tiu spért.

Il celebrant ni in’autra persuna fa I’introducziun alla messa.

3.    ACT PENITENZIAL

C Mes cars, avon che celebrar ils misteris da nies spindrament, lein nus examinar nossa cunscienzia e rugar Diu ed il proxim per perdun da nos puccaus. 

(La suandonta oraziun sa era curdar)

T Jeu confessel a Diu tutpussent ed a vus cheu presents d’haver tralaschau il bien e fatg il mal. Jeu hai fatg puccau cun patratg, plaid ed ovra. Per mia cuolpa, per mia cuolpa, per mia zun gronda cuolpa. Perquei roghel jeu la beada Maria semper purschala, tut ils aunghels e sogns e vus cheu presents da rugar per mei il Segner, nies Diu.

C Dieus, il tutpussent fetschi misericordia cun vus; el perduni vos puccaus e meini vus alla veta perpetna.

T Amen.

C All’entschatta da nies survetsch divin vulein nus far examen da cunscienzia e rugar il Segner, ch’el fetschi misericordia cun nus.

C Segner, ti eis tarmess dil Bab per far salvs quels d’in cor contrit:

Segner, pren puccau.

T Segner, pren puccau.

C Cristus, ti eis vegnius per clamar ils pucconts: Cristus, pren puccau.

T Cristus, pren puccau.

C Segner, ti eis ius a casa tier il Bab e stas en per nus: Segner, pren puccau.

T Segner, pren puccau

C Il Segner prendi da nus nossa cuolpa, che nus saveien celebrar cun cor sincer ils misteris da nies spindrament.

T Amen.

4. GLORIA

Il gloria vegn per ordinari cantaus. Ins sa denton era recitar el sco suonda:

Gloria a Diu en l’altezia e sin tiara pasch als carstgauns che Dieus careza.

Nus ludein tei. Nus benedin tei.

Nus adurein tei. Nus glorifichein tei.

Nus engraziein a ti muort tia gronda gloria. Segner Diu, retg dil tschiel, Diu, Bab tutpussent.

Segner, Fegl suletnaschiu, Jesus Cristus.

Segner Diu, tschut da Diu, Fegl dil Bab, ti che prendas naven il puccau dil mund, pren puccau da nus;

ti che prendas naven il puccau dil mund, retscheiva en grazia nies rugar.

Ti che sesas da vart dretga dil Bab, pren puccau da nus.

Pertgei ti sulet eis il sogn, ti sulet il signur, ti sulet igl altissim, Jesus Cristus, cul Spért sogn ella gloria da Diu Bab.

Amen.

5. ORAZIUN

C Lein urar…

Ei suonda in’oraziun dil di che cala aschia:

Entras Niessegner Jesus Cristus, tiu Fegl, che viva e regia cun tei en l’unitad dil Spért sogn, Dieus da perpeten en perpeten. 

T Amen.

6. CELEBRAZIUN DIL PLAID DA DIU

La messa dalla dumengia e dallas fiastas ha duas lecziuns I’emprema ord il veder testament ni ord igl «apostolus» (= brevs, fatgs dils apostels e palentada) e la secunda ord igl evangeli.

Tuts sesan.

7. LECZIUN

Ina lectura ni il celebrant legian la lecziun. Quella cala aschia:

C Plaid da Diu.

T Engraziament a Diu.

Ei suonda il dentercant, in psalm ni in toc musical sco mediatziun per la lecziun. 

8. ACCLAMAZIUN AGL EVANGELI

Suenter quella lecziun suonda l’introducziun agl evangeli cun ni senza igl alleluja.

Alleluja, (alleluja, alleluja).

Aschia plaida il Segner: «Tschiel e tiara vegnan a svanir, mes plaids demon vegnan buca a svanir.» Alleluja, (alleluja, alleluja).

Tuts levan sin peis.

9. EVANGELI

Avon igl evangeli ura il celebrant: Diu tutpussent, purifichescha miu cor e mias levzas, per che jeu seigi vengonzs d’annunziar tiu evangeli. Lu entscheiva el:

C Il Segner cun vus.

T E cun tiu spért.

C Ord il sogn evangeli tenor sogn … (Marc, Lucas, Mattiu, Gion).

T Gloria a ti, Segner.

Igl evangeli finescha culs plaids:

C Evangeli da nies Segner Jesus Cristus..

T Laud a ti, Cristus.

Il celebrant betscha igl evangeliar schend: Ils plaids digl evangeli destrueschien nos malfatgs.

10. PRIEDI

Dumengias e firaus suonda il priedi. Duront il pievel sesa il pievel.

11. CARDIENTSCHA (credo)

La cardientscha vegn recitada ni cantada da tuts presents. Tuts levan en pei. Il celebrant intonescha e tuts continueschan:

Jeu creiel enten in Diu,
Bab tutpussent,
scaffider dil tschiel e dalla tiara
ed enten siu sulet sogn Fegl,
nies Segner Jesus Cristus.
Il qual ei retscharts dil sogn Spért,
naschius da Maria purschala.
Ha endirau sut Pontius Pilatus,
ei vegnius crucifigaus, morts e satraus,
ei ius giu enten ils uffiarns,
il tierz di levaus si da mort en veta,
ei ius a tschiel e sesa da vart dretga da Diu Bab tutpussent,
danunder ch’el vegn a vegnir a derschar sur vivs e morts.
Jeu creiel enten in sogn Spért,
ina sontga catolica baselgia,
cuminonza dils sogns,
la remischun dils puccaus,
la levada dalla carn e la veta perpetna.
Amen.

12. ORAZIUN UNIVERSALA (= supplicas)

Il celebrant fa l’introducziun, il lectur, rsp. autras persunas, las supplicas. Il pievel rispunda quellas cun:

Nus rughein tei, exauda nus. (ni in auter clom)

Ellas supplicas seregorda la Baselgia da sesezza, da miserias, giavischs, dil mund universal,… 

13. CELEBRAZIUN DALLA EUCARISTIA

PROCESSIUN E PRESENTAZIUN DILS DUNS

Duront quella processiun conta il pievel in cant processiunal, ins sa denton era sunar orgla ed auters instruments ni schar ruaus. Tuts sesan.

Il celebrant pren il paun e di:

Benedius seigies ti, Segner, Diu digl univers, pertgei da tia buontad havein nus retschiert quest paun ch’ei fretg dalla tiara e dalla lavur da nos mauns. Nus presentein el avon tia fatscha, ch’ei daventi per nus il paun dalla veta.

Tier la mischeida da vin ed aua:

Segner, sco l’aua s’unescha cul vin, aschia vulein era nus s’unir cun Cristus ch’ei sehumiliaus ed ha priu part da nossa veta.

Il celebrant pren il calisch e di:

Benedius seigies ti, Segner, Diu digl univers, pertgei da tia buontad havein nus retschiert quest vin ch’ei fretg dalla vit e dalla stenta da nos mauns. Nus presentein el avon tia fatscha, ch’ei daventi per nus il calisch dil salit.

En spért da humilitonza e cun cor contrit rughein nus tei, Segner, nies Diu: Accepta nus e noss’unfrenda.

Tier fiastas vegn igl altar sco era l’unfrenda intschensada.

Il celebrant lava ses mauns e di: Segner, lava mei da tutta cuolpa e purifichescha mei da scadin puccau.

14.    ORAZIUN SUR ILS DUNS

Il celebrant fa la suandonta ni semeglionta introducziun:

C Frars e soras, lein urar, che mi’e voss’unfrenda seigi plascheivla a Diu, e ch’ella seigi per il salit dall’entira sontga baselgia.

T Il Segner retscheivi l’unfrenda da tes mauns per laud e gloria da siu num, per nies salit e per il salit da sia entira baselgia.

C Segner, nies Diu,

Nus purschein a ti il paun ch’ei fatgs ord da biars grauns ed il vin ch’ei fatgs ord da bia iuas e rughein tei: Dai a tia baselgia quei che quest duns significheschan: pasch ed unitad. Per quei rughein nus entras tiu Fegl Jesus Cristus, nies signur.

T Amen.

15. ORAZIUN EUCARISTICA (prefaziun e canon)

16. PREFAZIUN E SANCTUS

Tuts levan sin peis.

C Il Segner cun vus.

T E cun tiu spért.

C Alzei vos cors.

T Els ein alzai tiel Segner.

C Lein engraziar al Segner, nies Diu.

T Quei ei gest e dueivel.

(varianta) En verdad, igl ei gest e dueivel, bien e saluteivel d’engraziar a ti, sogn Bab, dapertut ed adina entras Jesus Cristus, nies signur.

El ei il Vierv entras il qual ti has tut scaffiu. Ti has tarmess el a nus per spindrader e salvader. El ei daventaus carstgaun entras il Spért sogn e naschius dalla purschala Maria.

El ha fatg tia voluntad ed acquistau per tei in pievel sogn.

Vid la crusch ha el stendiu o sia bratscha ed aschia destruiu la mort e manifestau la levada.

Perquei confessein nus culs aunghels e tut ils sogns tia gloria e clamein sco ord ina bucca:

Ei suonda il cant festiv dil sanctus. Sch‘ei vegn buca cantau san ins era recitar:

Sogns, sogns, sogns eis ti, Segner, Diu dallas armadas. Tschiel e tiara ein pleins da tia gloria. Hosanna ellas altezias.

Benedius ei quel che vegn en num dil Segner. Hosanna ellas altezias.

17. CONTINUAZIUN DIL LAUD EUCARISTIC

Il pievel semetta en schanuglias, resp. rest sin peis sche quei ei buca pusseivel.

Veramein, ti eis sogns, Segner, ti eis la fontauna da tutta sontgadad.

Perquei rughein nus tei:

Sanctifichescha ussa quests duns entras tiu Spért, ch’els daventien per nus il tgierp ed il saung da nies Segner Jesus Cristus.

Ei suonda la presentaziun dils duns al pievel en regurdientscha dalla sontga tscheina da Jesus. Duront la ceremonia tucca il zenn grond ed ils ministrants scalinan per sutlingiar l’impurtonza dil mument.

La sera avon che vegnir tradius ed ir libramein ella passiun ha Jesus priu paun e plidau il laud ed engraziament,

ha rut el e dau a ses giuvnals schend:

Prendei e magliei tuts da quel:

Quei ei miu tgierp che vegn daus vi per vus.

Aschia ha el era priu suenter la tscheina il calisch en ses mauns,

ha puspei engraziau e benediu, purschiu el a ses giuvnals schend:

Prendei e buei tuts orda quel.

Quei ei il calisch dalla nova e perpetna ligia, miu saung che vegn spons per vus e per tuts en remischun dils puccaus.

Fagei quei en memoria da mei.

C Misteri da cardientscha.

T Segner, nus annunziein tia mort e confessein tia levada entochen che ti tuornas.

Segner, seregurdond dalla mort e levada da tiu Fegl unfrin nus a ti il paun dalla veta ed il calisch dil salit. Nus engraziein, che nus astgein esser tes, star avon tia fatscha e survir a ti.

Humiliteivlamein rughein nus tei: Rimna ed unescha entras tiu Spért sogn tut quels che fan art e part dil tgierp e saung da Cristus.

18. COMMEMORAZIUN DILS VIVS, DILS SOGNS E DILS MORTS

Seregorda, Segner, da tia Baselgia spatitschada per igl entir mund entuorn.

Fai ella perfetga ella carezia, che tuts sestentien per unitad: nies papa N, nies uestg N, tuts spirituals ed il pievel cartent.

Seregorda era da nos frars e da nossas soras ch’ein morts cun la speronza dalla levada.

Seregorda da tuts defuncts che han cartiu en tia misericordia.

Fai sclarir sur dad els la glisch da tia fatscha.

19. LAUD TRINITAR

Entras Cristus, cun el ed enten el ei a ti, Diu, Bab tutpussent, ell’unitad dil Spért sogn tutta honur e gloria da perpeten en perpeten. Amen.

Tuts stattan sin peis.

20. PATERNIES

Il celebrant fa la suandonta ni ina semeglionta introducziun:

C Lein urar cun fidonza tier nies Bab en tschiel sco Jesus ha mussau:

Bab nos,
qual che Ti eis en tschiel,
sogns vegni fatgs il tiu num,
Tiu reginavel vegni tier nus.
Tia veglia daventi sin tiara sco en tschiel.
Nies paun da mintga di dai a nus oz.
Perduna a nus nos puccaus
sco nus perdunein a nos culponts.
E meina nus buc en empruament,
mobein spendra nus dil mal.

C Spendra nus, Segner, da tut mal. Dai buntadeivlamein pasch en nos dis. Mantegn nus en tia misericordia adina libers da puccau e segirs da tut embrugl: Lu astgein nus spitgar en speronza beada la vegnida da nies salvader Jesus Cristus.

T Pertgei tes ein il reginavel, la pussonza e la gloria a semper. Amen.

21. SALID DA PASCH

C Il Segner ha detg a ses apostels: Pasch lasch jeu anavos a vus, mia pasch dun jeu a vus. Lein perquei urar:

Segner, Jesus Cristus, buca fai stem da nos puccaus, mobein mira sin la cardientscha da tia baselgia. Dai ad ella buntadeivlamein pasch ed unitad sco ti has vuliu. Ti che vivas e regias da perpeten en perpeten.

T Amen.

C La pasch dil Segner seigi adina cun vus.

T E cun tiu spért.

22. TSCHUT DA DIU

Il celebrant pren la hostia e rumpa quella. Tuts stattan en schanuglias ni sche buca pusseivel sin peis. Duront la fracziun dalla hostia conta ni recitescha ins: 

Tschut da Diu,

ti prendas naven il puccau dil mund, pren puccau da nus.

Tschut da Diu,

ti prendas naven il puccau dil mund, pren puccau da nus.

Tschut da Diu,

ti prendas naven il puccau dil mund, dai a nus la pasch.

23. COMMUNIUN = LA SONTGA TSCHAVERA

Il celebrant envida ils  presents alla communiun cun ils suandonts plaids:

C Mirei il tschut da Diu che pren naven il puccau dil mund:

T Segner, jeu sun buca vengonzs, che ti vegnas sut miu tetg, di mo in plaid e mi’olma daventa sauna.

C Beai essan nus ch’essan clamai alla tschavera dil tschut.

Il celebrant sepervergia schend:

Il tgierp da Cristus salvi mei (nus) per la veta perpetna.

Il saung da Cristus salvi mei (nus) per la veta perpetna.

Suenter ch’il(s) celebrant(s) ha(n) pervergiau vegn la communiun distribuida al pievel. Duront la communiun suna l’orgla. Persunas che han pervergiau sesan.

C Il tgierp da Cristus. 

Co Amen.

24. CONCLUSIUN

25. BENEDICZIUN — RELASCHADA

Ei suonda l’oraziun finala ed il cant final.

Suenter las publicaziuns dat il celebrant la benedieziun cun ils suandonts ni semeglionts plaids:

C Il Segner cun vus.

T E cun tiu spért.

C Dieus, il tutpussent, benedeschi vus, + il Bab ed il Fegl ed il Spért sogn.

T Amen.

C Mei e la pasch cun vus.

T Engraziament a Diu.