Confiert
La veta sin tiara entscheiva culla naschientscha e va a fin culla mort. La mort smacca quels che stattan anavos, il temps da cordoli e malencurada ei in temps stgir e plein damondas. La sculptura enviers paisch cun sia structura filigrana e transparenta vul render confiert e speronza a quels e quellas che visetan il santeri. Las largias denter las petgas che sestendan encunter tschiel dattan liber la vesta sin cuolms e vals e muossan che la veta va vinavon cheu sin tiara ed ella perpetnadad.

Dudisch
Enviers paisch consista da dudisch petgas che sestendan dil fundament ensiviars e dattan tegn allas dudisch neblas che meinan sco scalems en direcziun dil tschiel e dalla paisch perpetna. Dudisch –  ina cefra impurtonta el mintgadi – ina cefra che significhescha era cunfins, il di ei partius en duas gadas dudisch uras ed igl onn ha dudisch meins. Tut ha ses cunfins,  tut ei limitau, exact sco la veta. La cefra dudisch anflan ins era adina puspei ella bibla, sco per exempel ils dudisch apostels ni las dudisch schlatteinas d’Israel.

Egualitad
Il cuors dalla veta terrestra entscheiva culla naschientscha e va a fin culla mort – cun tuts vai tuttina, quei destin pertucca gronds e pigns, paupers e rehs. Per Diu ein tuts tuttina. Quei simboliseschan la sulada da granit e la tschunavla nebla dad enviers paisch. Omisduas han la medema fuorma, quella dils cunfins dalla vischnaunca da Mustér. La sulada el funs ha ina gronda surfatscha, la nebla ina pintga – omisduas ein denton tuttina entras la fuorma identica, independent dalla grondezia.

Tschiel e tiara
La rucla giudem la sculptura simbolisescha il mund, la tiara. Ella ei da fier che fa ruina e vegn a svanir, exact sco nossa veta terrestra.

Nossa veta sespleiga bein sin tiara, ei denton in viadi permanent cun differentas staziuns e bein enqual carraun viers la fin terrestra e viers la perpetnadad. Quei viadi muossa la sculptura enviers paisch cun las dudisch neblas, ils dudisch scalems che meinan alla rucla che paradescha sisum la sculptura e tarlischa sco argien. Ella reflectescha il tschiel e muossa l’infinitadad, la perpetnadad suenter la mort terrestra. La rucla fa buca ruina, ella vegn ad exister en “perpeten”.

Omagi
Jesus da Nazaret ei naschius e morts per nus ed ha purtau la paisch. Che la sculptura enviers paisch ei drizzada ora viers Nazaret duei esser in omagi ad El. La distanza dalla sulada tochen sut la rucla dalla perpetnadad mesira quasi tuttina biars millimeters sco la distanza en kilometers da Mustér enviers Nazaret, enviers paisch. 

Antonino Di Bella, november 2020