Cars frars e caras soras en cardientscha
Oz da venderdis sogn, meditein nus sur dalla passiun e mort da Jesuse siu irtiel Bab. Pitir e murir ei la davosa consequenza da sia incarnaziun. «La novavla ura ha Jesus dau in griu ed eispartius.» La novavla ura ei tenor nies quintar, las treis suenter miezdi. Tenor las perdetgas dils evangelis, ha il cumbat da mort da Jesus cuzzau treis uras. Els raquentan dad ina stgiradetgna, e dad in tiaratriembel e da greppa ch’ei sefendida e dalla tenda dil tempel che ha survegniu in scarp da sum toccadem.
La liturgia dil venderdis sogn entscheiva cun in grondsilenzi, cun adoraziun tgeua.
La mort privescha nus da plaids
Tgi che ha gia zacu accumpignau in moribund en sias davosas uras, sa, che la mort sa far che nus savein buca tgei dir, fa quescher.La mort ei enzatgei sco in mir stgir. Nus essen sepiars.
La mort privescha nus da plaids
Il venderdis sogn, il di dalla mort dil Segner,entscheivacun in grond silenzi.Quei silenzi ei aschi impressiunonts e muenta nus, cu il spiritual semetta giun plaun, en num da nus tuts. Nus stuein sesbassar avonil misteri da Diu. Mo en tgeuadad e consternaziun savein nus mirar sil misteri da nies spindrament.Quei silenzi e quella consternaziun sentin nus era ella lecziun che nus udin dil profet Jesaja. Quel scriva: «El, Cristus, ha purtau nossas malsognas; el ha priu sin el nossas dolurs; entras sias plagas essan nus salvai.»
Jesaja muossa a nus co nus duein capir la passiun da Jesus: Il spréz e las beffas, sia fleivlezia, siu disdir, siu abandun e sia desparaziun: Quei tut ein nossas plagas ch’el ha purtau per nus. Mo quei ein denton el medem temps las plagas, tras las qualas nus essan spindrai.
Ils apostels e tut quels ch’eran suondai Jesus, fuvan consterni pervia dil pitir e la mort da Jesus. Veva el buc empermess il reginavel da tschiel, — ed uss ? Ha la mort destruiu tut? Ha la mort gudignau pussonza sur dil Fegl da Diu? Han uss stgiradetgna, pitir, malsognas e mort la pussonza sin quest mund? Sche schizun il Fegl da Diu ha stuiu pitir dolurs e la mort, co savein nus carstgauns normals vegni salvai? Quels treis dis ein ils apostels e tut quels che vevan suondau Jesus, dis da consternaziun e dis stgirs. Ils inimitgs da Jesus han giu grond plascher ed han cartiu da ver la victoria enta maun. Els han cartiu che Jesus seigi morts e resti morts per adina. Quei plascher e quella satisfacziun hanbuca cuzzau ditg, mo treis dis.
Sin la via dalla crusch da Jesus entupein nus quater gruppas da carstgauns. La pussonza vevan ses inimitgs. Ils apostels ein fugi, plein anguoscha. Lu deva ei da quels che miravan tier. Mo ei ha era dau ils carstgauns fideivels, che han teniu ò tochen sut a crusch. – Tier tgei gruppa audel jeu? Sun jeu cheu oz per mirar sil pitir da Jesus sco aspectatur, ni selaschel jeu muentar tochen el pli profund dall’ovra dil spindrament che Jesus ha fatg per mei? Sun jeu promts da dar risposta a quella immensa carezia da Jesus en mia veta?
Jesus ha mussau a nus che la mort fa buca mo ch’ins sa buca tgei dir, mobein ch’ella ei la gronda punt tier Diu. Papa Francestg di quei cun auters plaids: «La crusch ei buca la staziun finala, mobein passadi vi en ina veta nova.»
Perquei che Jesus ha spindrau nus vid la crusch, astgein nus senza gronds plaids mirar sin ELe sia crusch plein cardientscha. Ils evangelists annunzian: «El ei morts quella mort per nus e per il salit digl entirmund.»EL ei nossa suleta speronza. Tgi che mira sin EL ell’ura da sia mort, miera buc senza speronza. Cun Jesus astgein nus dir: «Bab, en tes mauns surdun jeu miu spért.»
Lein mirar sin la crusch. Jesus mira sin nus;elha aviert sia bratscha sco per dir: Neu tier mei, sefida da mei! Ina pli gronda carezia vegnas ti mai ad anflar! Jesus ha inaga detg: «Cu jeu sun alzaus dalla tiara, vegn jeu a trer tuts tier mei.» [Gn 12,32]
L’egliada sin la crusch sa dar a nus salit e speronza, oravontut en grevs temps. Nus savein lu: Pitir, miseria e mort han buc il davos plaid.
Gie, nus lein venerar la crusch da Jesus cun nossa attaschadadad, cun nossa carezia e cun la forza da nossa fidonza. Lu benedescha EL nus e nus savein ir la via da nossa veta plein speronza, sco carstgauns reconciliai. Ed aschia astgein nus confessar en verdad: «Ella crusch ei salit, — ella crusch ei veta, —ella crusch ei speronza. Amen.»
