Beinvegni al niev plevon a sur Mathew Kurian

Surprendentamein ha nies anteriur plevon sur Georg bandunau nossa pleiv l’entschatta settember digl onn vargau. Alla suprastonza eis ei reussiu beinspert da cattar in successur, denton pér sin l’entschatta fenadur 2019. Grazia al grond agid da nies anteriur plevon sur Alexi Manetsch, dil plevon da Medel/Lucm. sur Giusep Venzin e cun agid dalla claustra havein nus saviu salvar ils survetschs divins e las tradiziunalas fiastas ecclesiasticas. Grond engraziament ad els persuenter.

Ussa eis ei schi lunsch. Cun l’entschatta fenadur astgein nus beneventar nies niev plevon sur Mathew Kurian Vazhakapara. Sur Mathew ei naschius ils 15 da matg 1970 a Mullenkolly (India). Suenter las scolas fundamentalas eis el entraus el pign seminari da spirituals da Bathery. Suenter treis onns ha el midau el St. Mary’s seminari da spirituals a Trivandrum, nua ch’el ha studegiau filosofia duront 3 onns. 1996 ha el terminau quei studi cul Bachelor tier l’Universitad da Kerala. 1997 ha el entschiet cul studi da teologia. Quei studi ha el terminau il december 2000 medemamein cul Bachelor. Ils 2 da schaner 2001 ha el retschiert l’ordinaziun sacerdotala ed ei staus engaschaus en diversas pleivs dalla diocesa da Bathery. El november 2003 eis el serendius en Tiaratudestga ed ha absolviu ulteriurs studis tier l’Universitad catolica ad Eichstätt. Il mars 2008 ha el terminau leu siu ulteriur studi da teologia cul licenziat dalla Universitad dad Eichstätt. In meins pli tard ha el surpriu il post da subregens dil seminari da spirituals a Bathery. Egl onn 2010, cura che la nova diocesa da Putter ei vegnida fundada, eis el sedecidius da midar a Puttur. Tochen tier sia nova incarica a s. Gions eis el staus plevon ella pleiv St. George a Kodimbala. Plinavon eis el staus directur dalla scola aulta pedagogica Mar Ivanios a Kunthoor en la diocesa Puttur.

Sur Mathew enconuscha nossa pleiv, eis el gie staus els onns 2007 tochen 2009 duront 27 jamnas sco substitut duront las vacanzas da sur Alexi a Mustér.  Ussa astgein nus beneventar el sco nies niev plevon a s. Gions e nus essan perschuadi ch’el vegn a s’integrar en nossa pleiv tonpli spert ed esser per nus in bien plevon e pastur dallas olmas. En num da tuttas parochianas e tuts parochians astgel jeu exprimer a sur Mathew in sincer e cauld beinvegni. Nus selegrein da puspei haver in plevon e pastur dallas olmas en nossa pleiv.

La Pleiv s. Gions vegn a beneventar sur Mathew ufficialmein a caschun da si‘emprema s. messa la dumengia, ils 14 da fenadur 2019.

Cordialmein envidein nus parochianas e parochians da separticipar a quei survetsch divin da beinvegni. Ei fagess segiramein grond plascher al niev plevon d’astgar festivar quella s. messa en presenza da biaras e biars da nus. Suenter il survetsch divin dat ei la caschun da far in viva cun sur Mathew sil plaz Sut Gliendas avon casa pervenda. 

Aldo Tuor, president